Result ke baad kuch din tak ghar ka atmosphere normal tha.
Sab khush the ki main pass ho gaya.
Mummy roz bolti thi,
"Bas ab 11th me ache se focus karna."
Lekin mere dimaag me ek nayi tension chal rahi thi.
"Ab stream kya lu?"
Science… Commerce… ya Arts?
Har option ke saath ek alag future juda hua tha, aur main jitna sochta, utna hi confuse hota ja raha tha.
Shaam ko main apne dost Ranveer aur Vishu ke saath ground me mila.
Ranveer ne bina time waste kiye bola,
"Bhai main toh science PCM hi lunga, engineer banna hai."
Vishu muskura ke bola,
"Mera target clear hai, mujhe IAS banna hai. Main Arts lunga."
Dono ke answers sunke mujhe laga jaise sabke paas apna path already ready hai.
Sirf main hi tha jo abhi tak khud ko samajh nahi pa raha tha.
Vishu ne meri taraf dekha aur poocha,
"Aur tu, Sumit?"
Main kuch seconds chup raha.
Fir dheere se bola,
"Pata nahi yaar… sab bol rahe science le le, par mujhe darr lag raha hai."
Ranveer turant bola,
"Science tough hoti hai, but future strong hota hai."
Uski baat sahi bhi lag rahi thi.
Raat ko ghar aake papa ne bhi wahi topic chhed diya.
"Aaj kal sab science lete hain. Agar mehnat karega toh tu bhi kar lega."
Mummy ne support me kaha,
"Haan beta, science se options zyada rehte hain."
Unki baat sunke mera confusion aur badh gaya.
Mujhe maths theek lagta tha…
Lekin itna confidence bhi nahi tha ki science ka pressure handle kar paunga.
Raat ko bed par lete hue maine ceiling ki taraf dekha aur socha—
"Kya main science leke khud ko prove kar paunga?"
Ya fir ye decision meri life ka sabse bada mistake ban jayega?
Us raat neend fir se mushkil se aayi.
Result ka darr toh khatam ho gaya tha…
Par ab life ka asli pressure start ho chuka tha.