Life ka asli pressure shuru ho chuka tha…
aur us pressure ka naam tha — Science.
Agle din subah main school admission form ke saamne baitha tha.
Ranveer ne bina soche Science PCM choose kar liya tha.
Usne haste hue bola,
"Bhai engineer banna hai, science hi leni padegi."
Vishu ne Arts le li, kyuki uska IAS ka dream clear tha.
Aur main?
Main abhi bhi form ke stream wale box ko blank dekh raha tha.
Papa ne mere paas baithkar kaha,
"Beta, science tough zarur hai, par future strong hota hai."
Mummy ne bhi dheere se bola,
"Jo tujhe sahi lage wahi choose kar."
Maine ek gehri saans li.
Darr ke saath hi sahi…
Maine Science par tick kar diya.
Us moment pe laga jaise maine apni life ka sabse bada decision le liya ho.
Agla din mera 11th ka first day tha.
Nayi books, nayi class, naye students…
Sab kuch alag lag raha tha.
Classroom me enter karte hi meri nazar last bench par padi.
Ranveer wahi usual style me baitha tha, bag side me phek kar, full chill mood me.
Mujhe dekhkar haste hue bola,
"Bhai aa yaha backbench pe, science ka pressure kam lagega 😆"
Uski baat sunke mere face par bhi halka sa smile aa gaya.
Main uske paas hi baith gaya.
Thodi der baad class teacher andar aayi.
Unhone attendance register desk par rakha aur smile karke boli,
"Welcome to class 11 Science."
Puri class ekdum silent ho gayi.
Sabse pehle unhone bola,
"Chalo sab apna short introduction do."
Ek ek karke sab students khade hone lage.
Kisi ne bola usse doctor banna hai, kisi ne engineer.
Jab meri turn aayi, main dheere se khada hua aur bola,
"Myself Sumit… I am from this school only."
Teacher ne smile karke sir hilaya.
Fir unhone poocha,
"Kaun kaun dusri school se yaha admission lekar aaya hai?"
Class ke 6–7 students ne haath uthaya.
Tab mujhe feel hua ki sab mere jaise hi thoda nervous hain.
Ranveer ne dheere se mere kaan me bola,
"Dekh bhai, sabko hi pressure hai 😆"
Main halka sa has diya.
Uske baad teacher ne science stream ke basics samjhaye.
Physics kya hota hai
Chemistry me kya padhenge
Maths ka level kitna alag hoga
Unhone bas itna bola,
"Science me consistency sabse important hai."
Ye line seedha mere dimaag me baith gayi.
Class khatam hone ke baad jab main ghar aaya, mere mind me sirf ek hi thought chal raha tha—
"Kya main consistency rakh paunga?"
First day sirf introduction tha…
Par mujhe feel ho gaya tha ki aage ka journey easy nahi hone wala.